Каракол шаарынын конокторуна сейилдөө, ресторандарга баруу жана ажайып жайлары менен таанышуу үчүн ыңгайлуу жерде жайгашкан «Мөңгү» мейманканасы мурда номерлерди жылытуу боюнча көйгөйлөргө туш болгон. Мындан тышкары, мейманкананы долбоорлоодо абаны алмаштыруу үчүн кадимки желдеткич каналдар каралган эмес, бул имарат ичиндеги абанын сапатынын начарлашына алып келиши мүмкүн болчу.

Мейманкананын ээси Азамат Асанов, консультанттар менен кызматташтыкта энергияны үнөмдөө жана имараттагы абанын сапатын жакшыртуу боюнча бир катар чараларды ишке ашырды. Ишкер мейманкананын 14 номерине рекуператор орнотту, тышкы дубалдарды жылуулады жана энергияны үнөмдөөчү терезелерди орнотту.

Энергия үнөмдөөчү чараларды жана рекуператорлорду айкалыштыруунун максаттуулугу

Абанын рекуператорлору ички жана тышкы мейкиндик ортосундагы үзгүлтүксүз аба алмаштырууну, ошол эле учурда жылуулук жоготуунун эң төмөнкү деңгээлин камсыз кылган системаны билдирет. Бул түзүлүштөр жылуулук энергиясын 90% чейин сактоого мүмкүндүк берет, имаратты жылытууга жана муздатууга чыгымдарды олуттуу азайтат. Рекуператорлорду тышкы дубалдарды жылуулоо жана энергияны үнөмдөөчү терезелерди орнотуу сыяктуу энергия натыйжалуу башка чаралар менен айкалыштыруу ресурстарды максималдуу үнөмдөөгө мүмкүндүк берет.

Тышкы дубалдарды жылуулоо имараттагы жылуулук жоготууну жетиштүү түрдө төмөндөтөт, бул кошумча жылытууга же муздатууга муктаждыкты азайтат. Энергияны үнөмдөөчү терезелер жылуулуктун сырткы чыгышын токтотот жана тышкы температуралык өзгөрүүлөрдүн ички микроклиматка таасирин төмөндөтөт. Жалпысынан бул чаралар эң минималдуу энергия сарптоо менен имарат ичиндеги туруктуу жана жайлуу температураны камсыз кылат.

Алынган пайдалар

Көрсөтүлгөн чараларды ишке ашыруу «Мөңгү» мейманканасынын кардарлары үчүн ыңгайлуулук деңгээлин жогорулатууга мүмкүндүк берди. Туруктуу температура жана номерлердеги жаңы таза аба, эс алуу жана уктоо үчүн алда канча жагымдуу шарттарды түзөт. Рекуператорлор камсыз кылган абанын жогорку сапаты коноктордун ден соолугун жана саламаттыгын жакшыртууга салым кошот, бул алардын жалпы жашоо сапатына оң таасирин тийгизет.

Мындан тышкары, имараттарды жылытууга жана муздатууга чыгымдардын азайышы ресурстарды жана каражаттарды олуттуу үнөмдөөгө алып келди. Ресурстарды жана каражаттарды үнөмдөө мейманкананы андан ары өнүктүрүүгө жана жакшыртууга кошумча инвестиция салууга мүмкүндүк берет жана анын рыноктогу атаандаштыкка туруктуулугунун өсүшүнө көмөктөшөт.

Ошентип «Мөңгү» мейманканасы энергияны үнөмдөөчү чараларды жана абанын сапатын жакшыртуучу заманбап технологияларды колдонууга киргизүү аркылуу коноктордун жайлуулугун гана жогорулатпастан, эксплуатациялык чыгымдарды да кыскарта алды, бул жалпысынан бизнестин абалына оң таасирин тийгизди.